Salaan kashka iyo laabta ka soo go’day oo ku socota dhammaanba akhristayaasha kadib, waxay qormadani qayb ka tahay Silsiladdii Hibaaq ee beryan dambaba ku soo bixi jirtey mareegta Hadhwanaagnews . Waxayna qormadani la magacbaxday;
Ayuu Hooyga kula gelin.

Waxayna leedahay:

Inkastoon hamiga dheer
dhul shisheeye haabtoon
badahaa hiraayiyo
ka tallaabay haadaan

waxad tahay Hibaaqey
halbowlihii naftaydoo
habeenkiyo dharaartaba
waan kugu hamiyayaa

Waxad tahay Hibaaqey
hilibkii jidhkaygoo
hanaqaad ku taallaa.

Ma ogtahay Hibaaqey
in ay hamigaaga awgii
hurdadii yaraatoon
duhurkii hawaawiyo

Anoo heelkii Yurubiyo
hooy shisheeye joogaan
xalay waxaad ku hoyatiyo
hiirtii waxaad ku toostiyo
wararkaaga helayaa

Hadhwanaag mareegtiyo
Haatuf iyo wargeysyada
ayaan waxay soo habaaniyo
haddaba baal ka rogayaa

Hadhsana maayo jeeraan
wiilkii kugu habboonaa
hareeraha ka eegoon
Hoonka kaaga soo xulo

Ma ogtahay Hibaaqey
adiga horaad loo
hirka jooga aragtaye

inaad beri habowdoon
waayo aan ku haybshoon
inta habar dugaagiyo
haaddaa cirkoo idil
hilib aan wadaagnoon
ku maray huq oo idil

Ma ogtahay Hibaaqey
in aan hanfi iyo kulayliyo
holac iyo rasaasiyo
kuu maray harraad badan

Ma ogtahay Hibaaqey
adiga oon hadaaq baran
oo dhabta hooyadaa yaal
oo aad hadhqodaalka jiiftaan
inay hoobiyaha baas iyo
howsar nagu rideenoo
ooy hantideenii boobeen

Ma ogtahay Hibaaqey
waan heedadawnoo
hantideenii dhacantaye
markii aad ham weydeen
in naaskii hooyo kaa gudhay!

Ma ogtahay Hibaaqey
markii aad hiqlayseed
gaajada la hooyataba
inaan hilib bakayliyo
haragiisa kuu dubey!

Ma ogtahay Hibaaqey
hubkii ugu cuslaa iyo
diyaaradaha haadiyo
markii holacu kugu baxay
inay habar iyo dhasheedii
intay kala hallaabeen
ay kala huleeleen

Ma ogtahay Hibaaqey
xaggee baan ku hiran iyo
habeen socodka mooyiyo
in hadalkii samaa iyo
haasaawihii go’ay!

Ma ogtahay Hibaaqey
in aan halhaleel dhaqaaqnoo
heelkii Burcaadiyo Hargeysaba
ka yaacnoon hawdkaa ku noolayn

Ma ogtahay Hibaaqey
hooygeenii inuu dumey
oo aan meel habaas weyn
iyo Hartasheekha kugu furay

Ma ogtahay Hibaaqey
in herdankii colaadeed
kumanyaal ku hoydeen
kumanyaalna heermeen
kumanyaal hadaafsheen
oo ay hugoogii tuureen
oo ay weli hadraayaan

Ma ogtahay Hibaaqey
in aan hanashadaadii
marba hooyo hoogtiyo
hengel iyo dhibaatiyo
hoogeeyda dumarkiyo
hawl adduunnyo soo maray

Afartaa ha’leyda ah
haddaan hoos u sii hulo
oon hinjiyoo ku sii daro

waa gacalkii is heeriyo
hurintii colaadeed
hagardaamadeedii

waana hogo tusaalayn
iyo heer la soo maray
mudadii la heernaa
ee inta habar dugaagiyo
halaqyada dhul jiifiyo
haadku nagu cashayn jirey

waana hadalkii waayeel
iyo taariikh kaa hadhaysnayd
iyo halgankii la soo maray
u hilaadintiisii ee
halmaamin abidkaa

Haatanna Hibaaqey
waxan kugu hilaadshaa
heerkii guurka weeyaan

Hadduu Eebbe hidiyana
haasaawe wiiliyo
hanashada carruurtiyo
hooy baad geleysaa
ee hal baa iga dardaaran ah

Inantii hannaan wacan
ee haanshaarta suuqyada
raggu waw haliilaa
ee hugii dumar lahaa iyo
hiddaheenii soo xadho
Hab ku sii dushoo idil

hororada wax hiigiyo
halaq iyo abeesiyo
ha u daganin haawey
hilbahaaguun raba

Halna waxad ogaataa
in nin waliba haabiyo
qorshe hoos u jeedoo
hablo loo samaystiyo
hannaankiisa leeyahay

Haasaawe beeniyo
heemaalka quruxdiyo
hanti jeeb ka buuxdiyo
habeen aad cashaysiyo
waxaan heemis dhaafeen
ninna yaanu kugu hodin

Hebadkii la nuugiyo
haye dhow ha noqonine
hal adayg la hoowow
ee iska eeg hantaaqada
iyo godadkaa hadoodilan!

Bal aan kuu hilaadshee
raggu waa kun haybood
kala haabna weeyaan

hanad iyo hacoobaa
labaduba ku haybshaan
ee talo kaa habowdaa
huq dambay ku gelisaa!

Nin aan diinta lagu habin
oo ay waalidkii habaareen
ayuu hooyga kula gelin

Hor Allaba ninkaan baran
oon diinta kala hufkeediyo
cilmi haadintiisaba heersare
ka dhiganee halihiisa raacdaa
ayuu hooyga kula gelin

Higgaadaba nin aan baran
oo habeedii ku taallaa
ayuu hooyga kula gelin

Ma hambeeye haamaan
wali qaba hamuuntoo
afku haan ka weyn yahay
ayuu hooyga kula gelin

Ninka haanta buuxsadey
ee hadhuubkiina dhamayee
hambadiisa cunayeen
ubadkaaga hananayn
ayuu hooyga kula gelin

ninka ah habeen dhaxa
ee uu hir kale muuqdaa
waa haasaawe beenlee
ayuu hooyga kula gelin

Kuwa gala hudheelada
ee hablaha uun ugaadhaa
ayay hooyga kula gelin

Ninka jeega haystee
raganimo ka hoogey
hidinaaya laaluush
ayuu hooyga kula gelin

Hanfadaha aan wax hubinee
ee hilinkaad maraysiyo
dhulka hoos u eegeyn
ayuu hooyga kula gelin

Ninkaan hiirta kicinee
haaddaba ka dheerayn
ee hurdadu u macaantahay
ayuu hooyga kula gelin

nacas hoos u jeedoo
hidhidhiida soo jaqa
oo hawadaa maraayoo
hugii uu xidhnaa iyo
hayluhu ka dhacayaan
ayuu hooyga kula gelin

Hulka diirran kii gala
ee harawaaji raamsada
ee shimbiraha la heesaa
ayuu hooyga kula gelin

Afar daba harooshiya
iyo hebel ay yidhaahdaan
ninka hammiggisu u yahay
waa nacaskii hacooyee
ayuu hooyga kula gelin

Markay hees u qaadaan
ka halyey is moodee
hanaqiisa tumayee
habruhu ka cuudshaan
ayuu hooyga kula gelin

dhaqankeennii hoosiyo
hiddihii ka lumayee
een hooyadaa afgaraneyn
ayuu hooyga kula gelin

Ninka dhiilka heemsheen
hambadiisa dhiganeyn
ayuu hooyga kula gelin

Ninka haybta sheegtee
kala hira dadkeennee
haanhaan u kala rara
hor Alle e ka dheeraaw

Ninkaan heegadaa
iyo hirka sare ku geyneyn
hor Alle e ka dheeraaw

Mid kasta oo habaar qaba
oo Aadamuhu ay hiifaan
ayuu hooyga kula gelin

Ninkaan horumarkaaba
haabkiisa gelinee
haaneeta tiisee
haween kale u muuqdaan
Hibaaqey ka dheeraaw

Ducaan kuu hibeeyee
hadalkayga maqaloo
halaqyada ka dheeraaw!

oo inta lama huraanee
nafta ku huraysiyo
halyeyda ogsoonow
………….

wa bilaahi Tawfiiq

Cabdullaahi Maxamed Cumar

Bolton, England- UK