Afkaan jiil ku xidhay
oo juuqba waan gabaye

juqaal baan dhagaha galiyey
oo waan ka tegey jiifto oo idile

Inaan jiifo mooyiyi
beryahan Faysalow
joogba waan gabaye

Jir kalaa i haystoo
ka tegey jiifto idilkeede

intaan jeedey ayaa
dalkii jeex la iibsadaye
la jarjarey dhammaantii
sidii jeenigii adhiye
jilmad iyo tafaariiq
ragbaa jaad walba
u galaye

Jamhuuriyaddii oo rag
kala jimdhaday baan arkoo
hurdada jaaw ka soo idhiye

Jalkii ubadka niman baa
jaqoo jeebka buuxsadaye
jawaanno ayaa lagu gurtaa
wixii jeeb ka soo hadhaye

Jarmalka iyo waxa la geystaa
meelo loo jiraye
lagu jeexay daaree
miyaan cidiba soo jeedin?

jeegag baa loo qoraa
waliba jaahil xoogsadaye
jeebkaa lagu shubtaa
Faysaloow wixii jaad
ka soo hadha

ubadkiina wuu jashay
oo wada jaqaaqleeye

badh baa xabagta uun jiida
oon anfaco marin jidiinkaase
jirka qaar baan hoy ka gelin
iyo dhaxanta jiilaale

Jarar baa qodan jidadka
boodhku joogsado e

wuu jinqaday qofkii jilicsanaa
oo juuqba wuu gabaye

jaangooyo ma leh oo
qorshihii wuu kala janjeedhaaye
jihadii ka lumiye oo
dalkii jiiro sare raacye

Jaamacadaha kuwii qalinjabshee
cidi jihayn weydey

badahay jibaaxeen
sidii jeerta oo kale

jilibjilib baa dadkii loo jarjaray
iyo jeeni iyo qaare
jaahiliyadii baa lagu ceshiyo
jab ay ka doogeene

jiidhkii is dhalay bay kala jareen
oo ay kala jiheeyeene
jigrahay isugu dhiibayaan
jiidhkii wada yiile

Jananaaradii ina Siyaad
baa talishiyo
jiil xun oo kacaye

Lafaheeda kii jabaya
ayay jago u dhiibaane
jiidhdamaqsi
kii lagu arkaa
jeelka loo diraye

Juuq ninkii yidhaahdaba
afkaa laga jifeeyaa
raggii soo jihaadaa
haddeer jiilka loo diraye

Jalkii ubadka niman
baa jaqay oo jeebka
buuxsadaye
jawaanno ayaa lagu gurtaa
wixii jaadka soo hadhaye
Jarmalka iyo waxa geystaa
dhul aan cidi ka juuqayne

Jaanjaan ayay xisbiyadii noqdeen
oo way jahawareersheene
jaafaa jiriqa mooyiye
wax kale uma jihaysmaane
Jabhada sidoodii
hadday jilictamaayaane

Jalkii ubadka niman baa
jaqoo jeebka buuxsadaye
jiqiiq leeye ubadkii
aabahood jiitey waa hore

jirjirroole noqooy
Faysalow ninkay
Jinow u hooyeene
Hadba jaah la yimid
oo jabi distoorkiiye

miyaa lala jahaadaa
sidii kuwii jaaw yidhee tegey?

Ma jaawi baa lagu shidaa
iyo wixii jimanka saaraayey?

Mise jid kalaad u haysaa
waa kanoo jaankii tegi waaye!??